Eskualde Garapenerako Europako Funtsa (EGEF)

Eskualde Garapenerako Europako Funtsa (EGEF) finantza tresna bat da, eta bere helburu nagusia da ekonomia, gizarte eta lurralde kohesioa indartzea eta Europar Batasuneko eskualdeetan garapenean dauden desorekak zuzentzea, egoera txarrenean dauden eskualdeen bizi maila hobetzeko.

EAEko EGEF Programa 2021-2027

Bost helburu politikok bultzatuko dituzte EBren inbertsioak 2021-2027 aldian:

  • 1.HP: Europa adimentsuagoa, berrikuntzaren, digitalizazioaren, eraldaketa ekonomikoaren eta enpresa txiki eta ertainentzako laguntzaren bidez.

  • 2.HP: Europa ekologikoagoa eta karbonorik gabea, Parisko Akordioa aplikatuko duena eta trantsizio energetikoan, energia berriztagarrietan eta klima aldaketaren aurkako borrokan inbertituko duena.

  • 3.HP: Europa konektatuagoa, garraio estrategikoarekin eta sare digitalekin.

  • 4.HP: Europa sozialagoa, gizarte eskubideen Europako zutabea gauzatuko duena eta kalitatezko enplegua, hezkuntza, heziketa eta lanbide gaitasunak, gizarteratzea eta osasun laguntza jasotzeko berdintasuna babestuko dituena.

  • 5.HP: Herritarrengandik hurbilago dagoen Europa, tokiko kudeaketaren hazkunde estrategiak babestuko dituena eta EB osoan hiri garapen jasangarria lortzen lagunduko duena.

Arautegia
 
 

Espainiako Elkartze Akordioa 2021-2027 

Elkartze Akordioa dokumentu estrategiko bat da, 2021/1060 (EB) Xedapen Erkideen Erregelamenduan arautua, eta honako hauen inbertsioaren oinarrizko planteamendua eta lehentasunak jasotzen ditu 2021-2027 aldirako: Eskualde Garapenerako Europako Funtsa (EGEF), Europako Gizarte Funtsa Plus (EGIF+), Europako Itsas, Arrantza eta Akuikultura Funtsa (FEMPA) eta Bidezko Trantsizio Funtsa (FTJ).

Euskal Autonomia Erkidegoko 2021-2027 EGEF Programa onartzeko erabakia

Batzordearen 2022-11-29ko Betearazpen Erabakia, «EAEko EGEF Programa 2021-2027» onesten duena, Eskualde Garapenerako Europako Funtsaren laguntza jasotzeko, enpleguan eta hazkundean inbertitzeko helburuaren esparruan.

Euskal Autonomia Erkidegoko 2021-2027 EGEF Programa 

2021-2027 aldirako EAEko EGEF Programa plangintza dokumentua da, eta bertan zehazten dira hautatutako helburu politikoak eta espezifikoak lortzeko jarduketa estrategia, ekintza motak eta lortu beharreko emaitzak.

Programaren Ingurumen Ebaluazio Estrategikoa: Ingurumen Adierazpen Estrategikoa

Ingurumen ebaluazio estrategikoaren helburu nagusia da ingurumen alderdiak Programaren plangintzan txertatzea, eta, horrela, hasiera batetik, aurreikusitako jarduketek ingurumenean eragin kaltegarririk izan ez dezaten lortzea, Ingurumen ebaluazioari buruzko abenduaren 9ko 21/2013 Legean eta Planen eta programen ingurumen ebaluazio estrategikoa egiteko prozedura arautzen duen urriaren 16ko 211/2012 Dekretuan xedatutakoaren arabera.

Berdintasun Irizpena

EAEko EGEF Programaren (2021-2027) berdintasun irizpena, EMAKUNDE Emakumearen Euskal Erakundeak egina, genero ikuspegia txertatzen dela eta emakumeen eta gizonen berdintasuna betetzen dela bermatzeko.

Eskualde Garapenerako Europako Funtsaren (EGEF) kudeaketa "Euskal Autonomia Erkidegoko EGEF 2021-2027 Programaren" bidez antolatzen da. Helburu politikoek, inbertsio lehentasunek eta helburu espezifikoek osatzen dute, eta horiek garapen estrategia bat diseinatzen dute programazio aldi osoan. Eragiketaz arduratzen den zerbitzuak Europako Gaietarako Zerbitzuari eskatu beharko dio, Finantza eta Aurrekontu Zuzendaritzaren barruan, proiektu hautagaiak finantzatzeko. Proiektu horiek programarekin eta estrategiarekin lerrokatuta egon beharko dute.

Finantzaketa eskatzeko inprimakia

 

"Euskadi EGEF 2021-2027 Programan" sartutako jardueren hautaketa interes adierazpenen deialdien bidez egiten da. Hautaketa prozedura hori inbertsio publikoak diren eragiketetarako erabiliko da, esklusiboki dagozkien politika publikoen eremu jakin batean eskumena duten erakunde edo entitate publikoek zuzenean egindakoak.

Eragiketak hautatzeko irizpideak eta prozedurak nahitaez bete beharrekoak eta hautagarriak dira, eta kontuan hartu behar dira eragiketak hautatzeko prozeduretan, EGEFekin batera finantzatzeko. Proposamenak ebaluatzeko fasean erabiliko diren eragiketak lehenesteko irizpideek eragiketen kalitatea eta bideragarritasuna bermatuko dituzte eta programaren estrategiara eta kokatzen diren berariazko helburu zehatzetara egokitzen direla ziurtatuko dute.

Programazio aldian, ebaluazioak egin behar dira programaren diseinuaren eta gauzatzearen kalitatea hobetzeko, bai eta efikazia, efizientzia eta eragina baloratzeko ere. Ebaluazio jardueren emaitzak interesa duten eragile guztien artean zabaldu behar dira, programen kudeaketan txerta daitezen sustatzeko, eta jendearen eskura jarri.

EGEF Programen Ebaluazio Planak (2021-2027) bi zati ditu:

  • Ebaluazio Plan Bateratua. Programa guztiei eragiten dieten elementu komunak edo orokorrak jasotzen ditu, Europako Funtsen Zuzendaritza Nagusiak proposatu eta Ebaluazio Batzordean onesten direnak.

  • EGEF programa bakoitzaren Ebaluazio Plan Espezifikoa. Edukia autonomia erkidego bakoitzak proposatzen du, eta programa bakoitzaren jarraipen batzordeetan onesten da.

Arautegia